Grót á sjógv í Hvalba

Umhvørvisstovan hevur givið Hvalbiar kommunu umhvørvisgóðkenning til at gera útfylling út á sjógv til bátahyl millum kaiina á Hamranesi og verandi bátahyl. 

Hvalbiar kommuna hevur søkt um loyvi at leggja grót í sjógvin millum kaiina á Hamranesi og bátahylin á Bíargarði.

Grótgarðurin verður 215 metrar og 43 metrar av gróti skulu harafturat leggjast eystur úr bátahylinum á Bíargarði.

Grótið verður fingið úr vestara brimgarðinum á Hamranesi, úr grótbrotinum við Heygsvatn og úr nýggja hvalbiartunlinum.

Talan er um 40.000 rúmmetrar av gróti.

Ætlanin var upprunaliga bara at brúka grót úr nýggja hvalbiartunlinum, men Umhvørvisstovan sigur, at við tí høvdu 12 til 24 kilometrar av spreingileidningi úr plasti farið á sjógv.

Umhvørvisstovan hevur biðið Hvalbiar kommunu um at avmarka útlátið av plasti so nógv sum gjørligt.

Kann kærast 

Avgerðin um umhvørvisgóðkenningina kann kærast til landsstýriskvinnuna í umhvørvismálum. 

Freistin at kæra er til 24.juli.

Øll kunnu tó ikki kæra.

Kærurætt hava tey, sum avgerðin hevur ein serstakan, beinleiðis og persónliga týdning fyri, skrivar Umhvørvisstovan.