Jarðskjálvti í Kalifornia

Ein jarðskjálvti hevur verið í sunnara parti av amerikanska statinum California í morgun.

Jarðskjálvtin er máldur til 7,1 á Richter-stiganum og er tann ringasti, ið verið hevur í tvey áratíggju, verður sagt.

Ein annar jarðskjálvti var um somu leið hósdagin, og væntað verður, at aðrir fara at koma.

Boðað er ikki frá fólkaskaða av skjálvtanum, men eldur er komin í av gassleiðingarbroti.

Partur av jarðskjálvtaøki

Jarðfrøðiliga er California partur av einum jarðskjálvtaøki, sum gongur ígjøgnum amerikanska statin.

Ótti er fyri, at ein heilt stórur jarðskjálvti fer at koma, og seismologar siga, at hann er væntandi.

Jarðskjálvtin hesaferð merktist í Los Angeles, har ein baseball dystur var í miðbýnum. Áskoðararnir tóku til rýmingar, tá skjálvtin merktist undir teimum, men spælið á vøllinum helt fram.