Babylon er vorðin heimsarvur

Forni býurin Babylon í Mesopotamia er komin á listan hjá UNESCO yvir heimsarv.

Babylon er partur av Irak, og har hevur stjórnin í fleiri ár arbeitt fyri at fáa ta viðurkenning, ið tað er at standa á listanum yvir heimsarv.

Á fundi í Azerbajan, har serliga ST nevndin fyri heimsarv hevur hildið fund, verður m.a. sagt í eini yvirlýsing, at 4.000 ára gamli býurin umboðar tað stórveldi, ið Hammurabi og Nebukadnezar einaferð ráddu fyri.

Babylons býur var í fornari tíð millum tey sjey undurverkini við sínum upphongdu urtagørðum, men nú er býurin illa farin. Í nýggjari tíð hevur Saddam Hussein gjørt seg inn á býin við at byggja sær eina forsetaborg har, og seinni hava amerikanskir hermenn havt støð í býnum.

Babylon á døgum Nebukadnesar kongs er umrøddur í Gamla Testamenti. Hann hertók Jerusalem, legði tempul Sálamons í oyði og tók ísraelsfólk við sær til Babylon.