- Tíðindi, mentan og ítróttur
Demokratia: Nú er meira javnstøða í politikki
Demokratia: Nú er meira javnstøða í politikki
Ferð er komin á javnstøðu í politikki, heldur Demokratia og vísir á, at 30 prosent av løgtingslimunum í dag eru kvinnur
Demokratia fegnast à ársfrágreiðingini, at seinastu árini er ferð komin á javnstøðu à politikki
26.04.2012 - 10:33
Tá sagt verður, at ferð er komin á javnstøðuna í politikki, verður sipað til fólkatingsvalið og løgtingsvalið í fjør.
Demokratia, nevndin fyri øktum kvinnuleikluti í politikki, sigur í ársfrágreiðing sínari fyri 2010 og 2011, at nú eru 30 prosent av løgtingslimunum kvinnur. Tær vóru 21 prosent eftir valið í 2008 og níggju prosent eftir valið í 2004.
Men, sigur Demokratia, arbeiðssetningur nevndarinnar er ikki rokkin, fyrr enn Føroyar hava rokkið hinum Norðurlondunum, har eini 40 prosent av tjóðartingslimunum eru kvinnur.
Kvinnur mugu halda seg framat
Demokratia vísir eisini á, at bara ein kvinna og sjey menn eru í landsstýrinum. Í landsstýrinum, sum var undan hesum, vóru tríggjar kvinnur og fýra menn.
Tó eiga politisku flokkarnir ikki ábyrgdina einsamallir. Umráðandi er eisini, at kvinnur, sum hava hug, evni og umstøður, sjálvar halda seg framat og síggja møguleikar heldur enn forðingar, sigur Demokratia.
Vald tekur ein sjálv í staðin fyri at bíða eftir at fáa valdið frá øðrum, sigur Demokratia. Nú kommunuval verður í november, fer Demokratia at arbeiða fyri at fáa fleri kvinnur í kommunustýrini.
Eftir kommunuvalið í 2008 eru 30 prosent av kommunustýrislimunum kvinnur.
Er kopiera
Nýggjastu sendingar í ÚV
Nýggjastu sendingar í SV
