Harður dagur hjá Rannvá

Fríggjadagurin verður harður fyri badmintonspælaran, Rannvá Carlsson. Hon er í finaluni í tvímansleiki hjá kvinnum og í blandaðum tvímansleiki. Harafturat skal hon helst spæla bronsudystin í einmansleiki

Rannvá Carlsson skal spæla tveir finaludystir og ein bronsudyst í badminton seinasta dagin á oyggjaleikunum í Bermuda

Solby Christiansdóttir

18.07.2013 - 23:00

Stóri finaludagurin í badminton á Oyggjaleikunum í Bermuda er á skránni í morgin, fríggjadagin.

Føroyar luttaka í blandaðum tvímansleiki og í tvímansleiki hjá kvinnum. Í blandaða tvímansleikinum skulu Rannvá Carlsson og Niclas Eysturoy spæla, meðan Brynhild Carlsson og Rannvá Carlsson spæla kvinnu tvímansleikin. Harafturat er ein bronsudystur í einmansleiki hjá kvinnum, og har skal Rannvá Carlsson eisini spæla. Sostatt hevur hon tríggjar dystir á skránni í morgin, men tað verður kanska bert til tveir.

- Vit hava skilt, at mótstøðuspælarin í bronsudystinum møguliga hevur fingið skaða, so tað er ikki vist, at Rannvá skal spæla tann dystin, men jú, hon hevur ein harðan dag fyri framman, sigur Magnus Gaard, hjálparvenjari.

Finalan í tvímansleikinum hjá kvinnum byrjar klokkan 11 Bermuda tíð í morgin. Tað er klokkan 15 føroyska tíð.