Assad: Tvætl at Sýria nýtir evnafrøðilig vápn

Sýriski forsetin, Bashar al-Assad, vísir aftur, at hansara stýri hevur brúkt evnafrøðilig vápn í stríðnum móti uppreistrarfólkum í landinum.

- Viðmerkingarnar, sum politikarar í vestanlondunum og aðrastaðni koma við, eru ein háðan móti vanligum skynsemi. Tað er tað bera tvætl, sigur Assad í samrøðu við russiskt blað, sambært AFP og Ritzau.

Eftirlitsfólk í Sýria

Í dag fara eftirlitsfólk hjá ST at vitja forstaðirnar til Damaskus, har illgruni er um, at evnafrøðilig vápn eru nýtt í síðstu viku, upplýsir ST.

Fráboðanin kemur, eftir at Sýria og ST eru vorðin samd um at loyva eftirlitsfólkum at kanna økið, har hundraðtals fólk hava latið lív. Og sendiliðið hevur hevur skund.

Hevur skund

- Hvør tími telur. Vit hava ikki ráð til fleiri seinkingar, sigur ST-aðalskrivarin, Ban Ki-Moon, við fjølmiðlafólk í Seoul.

Enn er ikki endaliga staðfest, at evnafrøðilig vápn eru nýtt.

Men sambært "Læknum uttan mørk" hava túsundtals sjúklingar vitjað trý sjúkrahús í Damaskus síðani mikudagin við sjúkueyðkennum, sum líkjast gasseitran. 355 sjúklingar hava latið lív.

Geva hinum partinum skyldina

Heldur ikki er er staðfest, hvør hevur nýtt vápnini. Uppreistrarfólk og sýriska stjórnin geva hvørjum øðrum skyldina fyri at hava nýtt evnafrøðilig vápn í bardøgunum mikdagin.