Bakkafrost skal rinda skatt har virksemið er

Runavíkar kommuna fer ikki at fáa allan partafelagsskattin frá Bakkafrosti, hóast fyritøkan um fá ár fer at hava alt sítt virksemi á landi á Glyvrum.

Kommunurnar, har sum Bakkafrost hevur sínar aliringar, fara eisini at fáa sín part av skattinum. Tað sigur Johan Dahl, landsstýrimaður, í svari til Elsebeth Marcedis Gunnleygsdóttur, løgtingskvinnu, sum gjørdi vart við seg, tá Bakkafrost fyrr í summar kunngjørdi stóru framtíðarætlan sína.

Kommunurnar fáa 30 prosent av partafelagsskattinum. Virkar ein fyritøka bara í einari kommunu, fær tann kommunan allan partafelagsskattin, øll 30 prosentini.

Men hóast Bakkafrost fer at hava alt sítt virksemi á landi á Glyvrum, millum annað kryvjingina, sum nú er í øðrum kommunum, fer fyritøkan framvegis at hava aliringar í øðrum kommunum, sum so eiga sín lut í partafelagsskattinum.

Annars er ikki komin nógvur partafelagsskattur frá alivinnuni seinastu árini, sigur Johan Dahl. Stór hall í 2005 og 2006 eru flutt fram. Og alifyritøkurnar hava útsett nógvan skatt so hvørt sum goymslurnar eru øktar.

Johan Dahl sigur, at Vinnumálaráðið, Fíggjarmálaráðið og Havbúnaðarfelagið viðgera í løtuni spurningin, um kommunurnar eiga at sleppa at taka pengar, loyvisgjald, frá alibrúkum fyri aliøkini.