IMF: USA eigur at hækka skuldarloftið

Alsamt fleiri eygu eru vend móti USA í hesum døgum.

Stjórin fyri Altjóða Gjaldoyragrunnin, Christina Lagarde, heitir á amerikansku politikararnar um at hækka skuldarloftið, sum fer úr gildi hósdagin. Verður eingin semja um fíggjarlógina í seinasta lagi hósdagin, fer USA í gjaldsteðg, og kann ikki rinda sínar rokningar.

- Tað er sera, sera ørkymlandi. Tað kann elva til ovurstóran fíggarligan ófrið og búskaparligt hóttafall, sigur stjórin fyri Altjóða Gjaldoyragrunnin í samrøðu við amerikansku sjónvarpsrásina, NBC News.

Samanber støðuna við fíggjarkreppuna

Christine Lagarde samanber støðuna, tá fíggjarkreppan byrjaði í 2008, tá fleiri amerikanskir fíggingarstovnar fóru á heystin, sum hevði við sær drúgva búskaparliga afturgongd í øllum heiminum. Eisini aðrir leiðarar hava ekka um støðuna.

Stjórin fyri Heimsbankan, Jim Yong Kom, heldur, sambært New York Times, at heiminum er dagar frá eini sera vandamiklari støðu, og at hetta kann serliga raka tey fátæku londini.

Málið loysast beinan vegin

Týski fíggjarmálaráðharrin, Wolfgang Schauble, er komin við eini beinleiðis áheitan á amerikansku politikararnar:

- Fíggjarpolitiski knúturin skal loysast beinanvegin, sigur hann við New York Times.

Samráðingarnar millum Barack Obama, forseta, og republikanska samráðingarmaðurin, John Boehner, slitnaðu leygardagin. Í gjár gjørdu umboð fyri demokratarnar og republikanararnar enn eina roynd, men einki spurdist burturúr.