Ættleiðingarfelagið: Ov stutt barsilsfarloyvi

Hædd verður ikki tikið fyri ættleiðingarforeldrum í uppskotinum um barsilsfarloyvi.

Tað sigur Ættleiðingarfelagið í skrivi.

Felagið vísir á, at tað bæði er kostnaðarmikið og tíðarkrevjandi at ættleiða.

Millum annað krevja gevaralondini, at ein skal uppihalda sær longur í landinum, tá ein heintar barnið.

Sum dømi er kravda uppihaldstíðin í Etiopia, har meginparturin av føroysku børnunum verða ættleidd, hækkað úr einari viku upp í 4-5 vikur.

Men av tí at barsilsfarloyvi ikki er gjørligt, fyrr enn barnið er móttikið, mugu flestu foreldur taka sær frí uttan løn ella barsilspening til uppihaldið.

Ættleiðingarfelagið vísir á, at í eitt nú Danmark fáa ættleiðingarforeldur farloyvi upp til fýra vikur áðrenn móttøku av ættleiddum barni, og tey hava eisini møguleika at leingja tað við 4 vikum afturat, um viðurskifti krevja longri uppihald í gevaralandinum.