Norðmaður heimsmeistari í talvi

Noreg hevur fingið ein heimsmeistara í talvi.

Í dag hava Magnus Carlsen og Vishi Anand telvað 10. talvið í heimsmeistarakappingini í Chennai í India. Eftir at Magnus Carlsen vann 9. talvið í gjár, skuldi hann bara hava eitt hálvt stig afturat fyri at kunna gerast heimsmeistari. Og tað fekk hann í dag.

Talvið gjørdist drúgt, og eftir 65 leikir endaði tað javnt, tá øll fólkini á borðinum uttan kongarnir báðir, vórðu offrað. Sostatt endaði talvið javnt - remis - og harvið kundi 22 ára gamli Magnus Carlsen heiðrast sum nýggjur heimsmeistari.