Grønlandsbankin stórt yvirskot

- Tá hugsað verður um afturgongdina í grønlendska samfelagsbúskapinum, eru vit avgjørt nøgd við úrslitið, sigur stjórin í Grønlandsbankanum, Martin Kviesgaard, við grønlendska kringvarpið.

Útlánini eru nógv minkað, men tað er tí, at fleiri byggiverkætlanir vórðu lidnar í fjør og fyrraárið, og tí er tað ikki óvæntað, sigur bankastjórin. Hann vónar, at meiri verður lænt út í ár, tí ætlanir eru um fleiri byggiverkætlanir.

- Meiri ferð eigur at koma á grønlendska búskapin, og tað er ikki nóg mikið við almennari bygging, sigur Martin Kviesgaard.

Líkt er, til, at viðskiftafólkini halda sínar skyldur í Grønlandsbankanum, tí niðurskrivingarnar eru bert 15 mió. kr.

Partaeigararnir fáa slakar 100 milliónir kr. í vinningsbýti. Í ár væntar Grønlandsbankin at hava millum 125 og 145 milliónir kr. í avlopi.

Nevndarformaður í Grønlandsbankanum er Gunnar í Liða.