Viktor Janukovitsj eftirlýstur fyri hópdráp

<p>- Eitt mál um hópdráp av sivilum fólki byrjar nú, og Janukovitsj, og onnur fólk, ið kunnu dragast til svars, eru eftirlýst av løgregluni, sigur virkandi innanríkisráðharrin í Ukraina.</p>

<p>Sambært innanríkisráðnum í Ukraina var forsetin, Viktor Janukovitsj, sunnudagin seinnapartin staddur onkrastaðni í Krim, eftir at hann í farnu viku flýddi úr Kiev, har ófriður hevur valdað.</p>

<p>Arsen Arakov, virkandi innanríkisráðharri, skrivaði á Facebook sunnudagin, at Viktor Janukovitsj sunnukvøldið varð sæddur í bili í Krim saman við trygdarvørðum.</p>

<p><strong>Trygdarlið savnað</strong></p>

<p>Eftir ógvusligan ófrið í fleiri dagar, har fleiri enn 80 fólk eru deyð á gøtunum í Kiev, flýddi forsetin, Viktor Janukovitsj, í eini tyrlu fríggjadagin, skriva útlendskir netmiðlar, teirra millum tíðindastovan Interfax.</p>

<p>Síðan er leiðin løgd frá Kiev til Kharkiv, eystarlaga í landinum, og víðari til Donetsk, har marknaløgreglan fekk hildið flogfarinum hjá Janukovitsj aftur. Síðani fór Janukovitsj til Krim-hálvoynna.</p>

<p>Í einum privatum húsum í Balaclava-landspartinum á Krim savnaði hann trygdarvørðar sínar og gav teimum valið millum at fylgja við honum ella geva seg yvir, sigur virkandi innanríkisráðharrin, Arsen Avakov.</p>