Skipan av nýggjari stjórn í Ukraina útsett

<p>Lóggávutingið í Ukraina hevur fyribils útsett at skipa eina nýggja, fyribils stjórn til hósdagin, upplýsir virkandi forsetin í landinum, Oleksander Turtjinov, ið eisini er formaður í lóggávutinginum.</p>

<p>Virkandi forsetin ber ótta fyri, at landið fer í tvíningar, nú Janukovitj er rikin frá valdinum. Tí skal skipan av nýggjari fyribils stjórn fyrst umrøðast við trygdarlið í Ukraina, skrivar Jyllands Posten.</p>

<p>Limir í lóggávutinginum hava ávarað um, at Ukraina kann fara í tvíningar, tí fólk eystarlaga í landinum eru í iva um avleiðingarnar av, at Janukovitj er rikin frá valdinum.</p>

<p><strong>Fleiri enn 80 fólk latið lív</strong></p>

<p>Virkandi forsetin í Ukraina, Oleksander Turtjinov, sigur, at limirnir í lóggávutinginum í seinasta lagi í dag skuldu semjast um, hvussu ein fyribilsstjórn kann&nbsp;skipast.</p>

<p>Í farnu viku viðtók lóggávutingið, at formaðurin í lóggávutinginum fyribils verður forseti í Ukraina. Lóggávutingið viðtók eisini, at Janukovitj skuldi rekast frá valdinum.</p>

<p>Fleiri enn 80 fólk hava seinastu vikurnar latið lív í ófriðinum í Ukraina. Viktor Janukovitj flýggjaði úr Kiev, tá samanbrestirnir vóru í hæddini í seinastu viku.</p>