Kunnu taka gjald fyri heimasjúkrarøkt

- Broytingin, sum politikararnir ikki tosa hart um, kann fáa álvarsligar avleiðingar fyri vanliga borgaran.

Tað sigur forkvinnan í felagnum Føroyskir Sjúkrarøktarfrøðingar, Óluva í Gong í lesarabrævi, har hon ávarar um eina stóra broyting, sum er á veg í heimasjúkrarøktini.

Hon harmast um, at alt orðaskiftið snýr seg um "at leggja eldraøkið út til kommunurnar", tí tær týdningarmestu broytingarnar  verða ikki umrøddar, - nevniliga, at kommunurnar fáa heimild at taka brúkaragjald fyri tænastur, ið hava verið ókeypis fyri øll.

Kunngerðir verða strikaðar

Óluva í Gong sigur, at størsta broytingin fyri sjúkrarøktina er, at lógin um heimasjúkrarøktartænastuna og kunngerðirnar, ið hoyra til lógina, verða strikaðar.

Tað hevur við sær, at § 1 í kunngerð um heimasjúkrasystratænastuna, sum sigur at "heimasjúkrasystratænastan fevnir um allar persónar, sum eru staddir í Føroyum", og at "heimasjúkrarøkt verður veitt ókeypis", hvørvur. Ístaðin kemur § 18 í nýggju lógini, har tað stendur í stk. 1, at kommunurnar kunnu krevja gjald frá borgaranum fyri tænasturnar, og at landsstyrismaðurin ásetir í samráð við kommunurnar nærri reglur um gjald eftir stk. 1.

- Hetta er ikki nakað, sum politikararnir tosa hart um, men hendan orðing kann fáa álvarsligar avleiðingarr fyri vanliga borgaran, ávarar Óluva í Gong.