- Tíðindi, mentan og ítróttur
Ukraina heitir á Trygdarráðið hjá ST um hjálp
![](https://kvf.fo/sites/default/files/styles/grein-ovasta-mynd/public/ruuk.jpg?itok=V6X_1nFm)
Lóggávutingið í Ukraina biður nú Trygdarráðið hjá ST um at kalla inn til snarfund, til tess at viðgera trupulleikarnar í Ukraina, skrivar Reuters.
Áheitanin kemur í kjalarvørrinum á ógvusliga ófriðinum í landinum seinastu vikurnar, har út við 100 fólk hava latið lív í uppreistrinum og ófriðinum.
Høvuðsorsøkin, til at lóggávutingið í morgun heitir á Trygdarráðið, er, at hermenn fyrr í morgun høvdu kringsett og hertikið tveir flogvallir á Krim hálvoynni.
Innanríkisráðharrin fordømir hertøkuna
Fyrr í morgun varð ein almennur flogvøllur hertikin av vápnaðum hermonnum. Hermenninir hava tó tikið seg aftur og eru flýddir av flogvøllinum aftur.
Tíðindastovan Interfax skrivar, at ein hernaðarflogvøllur í Ukraina seinni í morgun varð kringsettur av vápnaðum hermonnum.
Innanríkisráðharrin í Ukraina, Arsen Avakov, fordømir hertøkuna av teimum báðum flogvallunum á Krim hálvoynni í morgun.