Umleggingar av sendinetinum halda fram

Umleggingin av sjónvarpssendinetinum heldur fram í 2014. Gomlu analogu sjónvarps sendararnir verða sløktir so við og við, og í staðin sæst sjónvarpið hjá Kringvarpinum talgilt (digitalt) á sendinetinum hjá Televarpinum. 

Hjá summum hyggjarum er ikki neyðugt at gera nakað, hjá øðrum hyggjarum verður bara neyðugt at dagføra móttøku útgerðina, meðan onnur, við gomlum sjónvørpum, kunnu verða noydd at skifta sjónvarp. 

Fólk, ið longu síggja Kringvarp Føroya talgilt, gjøgnum Televarpið, nýtast ikki neyðturviliga at dagføra teirra útgerð.

Hetta arbeiðið byrjaði í fjør og heldur fram í ár. Trý stig eru eftir, og tey verða øll framd í ár. 

Fyrsta umleggingin verður framd um tríggjar vikur, tann 1. apríl. Tá fara íbúgvarnir í Klaksvík, Ánunum, Haraldssundi, Leynum, Hovi, Porkeri, á Nesi, í Økrum og Lopra bert at síggja Kringvarpið í Televarpinum. 

Hinar báðar umleggingarnar, sum eru eftir, verða framdar 1. juli og 1. november í ár.