Nýtt flogfelag byrjar flúgving í Grønlandi

Tvey flogfeløg fara nú at kappast um grønlendsku ferðafólkini. Seinastu mongu árini hevur Air Greenland verið einsamalt um flúgvingina, men 2.juni fer Greenland Express Air at flúgva millum Danmark, Grønland og Ísland, skrivar Sermitsiak.

Greenland Express Air hevur langleigað eitt flogfar av slagnum Fokker-100, sum tekur 100 ferðafólk. Tað fer at flúgva millum Aalborg og Keypmannahavn í Danmark, Keflavík í Íslandi og Kangerlussuaq - Syðra Streymfjørð - og Narsassuaq í Grønlandi. 

Í leigusáttmálanum hevur flogfelagið eisini tryggjað sær eitt flogfar aftrat, sum skal verða tøkt, um tekniskir trupulleikar verða við hinum flogfarinum. Hetta flogfarið kann eisini flúgva leiguflúgving. Flogfarið, sum Greenland Express hevur leigað, er frá 1995, og leigusáttmálin er trý ár.