Nýggi ukrainski forsetin mælir til frið

Petro Poroshenko varð í dag tikin í eið sum forseti í Ukraina. Hann segði seg vilja hava semju við fólkið í Eysturukraina og hvørki kríggj ella hevnd.

Men Petro Poroshenko segði seg eisini hava sagt við russiska forsetan, at Krim hálvoyggin fór altíð at vera partur av Ukraina.

Krim varð innlimað í russiska samveldið eftir kollveltingina í Ukraina, ið fekk russiskt vinarliga forsetan at flýggja til Russlands, har hann hevur verið síðani.

Millum útlendsku stjórnarumboðini í Kiev í dag var amerikanski varaforsetin Joe Biden.

Russiski sendiharrin í Kiev, Mikhail Zurabov, var eisini hjástaddur og segði aftaná hátíðarhaldið, at ukrainska stjórnin eigur at enda hernaðartiltøkini treytað av at uppreistrarliðini í Eysturukraina samstundis seta í verk vápnahvíld.

Samstundis sum ynskini um frið vóru borin fram í Kiev, vóru samanbrestir millum ukrainska stjórnarherin og uppreistrarlið bæði eysturi í Sloviansk og suðuri í Mariupol.