Landsstýrismaðurin fegnast um nýggja strategi

- Dagførda Vága Floghavn varð tikin í nýtslu í gjár, og í dag hevur Atlantsflog lagt fram eina skilagóða strategi. Saman peika hesi rætta vegin fyri føroyskar brúkarar.

Tað sigur landsstýrismaðurin í vinnumálum, Johan Dahl, nú Atlantsflog hevur almannakunngjørt framtíðarætlan og -másetningar sínar í "Strategi 2018".  Johan Dahl umboðar nú allan partapeningin í Atlantsflogi

Yvirskipað sigur flogfelagið seg vilja gera tað bíligari, lættari og einfaldari hjá brúkarum at ferðast loftvegis úr og til Føroya.

Brúkarin í fremstu røð

- Fokus er á tí rætta, og tað er í tøkum tíma, at brúkarin kemur í fremstu røð. Tað hava mong saknað í mong ár.  Nýggja leiðslan brúkar fyrst og fremst lyklaorðið "bíligari", og júst tað hevur stóran týdning. Føroyski brúkarin vil hava bíligari flogferðir, og tað er eisini høvuðsprioriteturin hjá mær sum landsstýrismanni í samferðslumálum, sigur Johan Dahl.

- Flogfelagið gevur í dag eitt týðandi lyfti um, at tað verður bíligari, lættari og einfaldari at vera kundi. Hetta lyftið má Atlantsflog liva upp til, sigur landsstýrismaðurin í vinnumálum í tíðindaskrivi.