Kvotur sambært fiskifrøðini

Í Íslandi er longu avgjørt, hvussu nógv, skip og bátar sleppa at fiska næsta fiskiár, sum byrjar 1.september.

Sigurður Ingi Jóhannsson, fiskimálaráðharri, lurtar eftir fiskifrøðingunum. Kvoturnar, sum ráðharrin hevur ásett, eru júst tær somu, sum íslendska havstovan mælti til. 
Tað er galdandi fyri øll fiskasløg.   

Sigurður Ingi Jóhannsson sigur, at hann heldur tað vera umráðandi, at Ísland hevur gott orð á sær hjá øðrum fiskivinnutjóðum og hjá teimum, sum keypa fisk.
Tí eiga avgerðir um kvotur at byggja á vísindi, sigur ráðharrin, sum heitir á fiskifrøðingar og fiskimenn um at arbeiða saman, tí viðhvørt er ikki samsvar millum royndirnar hjá fiskimonnum og niðurstøðurnar hjá fiskifrøðingum.

Ísland er ikki við í semjuni millum strandarlondini um makrelin í ár. 
Íslendska makrelkvotan í ár er knappliga 168.000 tons, 16,6 prosent av heildarkvotuni, sum ICES mælir til.