Skal verða lættari at skilja brøv frá TAKS

Skattaborgarar, sum hava ilt við at skilja brøvini, tey fáa frá TAKS, kunnu gleða seg.

Tí TAKS søkir nú eftir málfrøðingi. TAKS vil hækka málsliga stigið og fáa ein góðan og livandi málpolitikk.

TAKS sigur, at málpolitikkurin skal tæna tveimum endamálum. Hann skal virka fyri, at málburðurin hjá TAKS samsvarar við føroyska málið. Og hann skal stuðla undir, at samskiftið hjá TAKS er so gott og greitt sum gjørligt.

Nýggjur málpolitikkur

Málfrøðingurin hjá TAKS skal orða nýggjan málpolitikk fyri TAKS, endurskoða standard brøv og skabilónir í KT-skipanunum hjá TAKS,  læra starvsfólkini at skriva brøv, undirvísa í føroyskum og viðhvørt eisini gera annað arbeiði á HR- og Samskiftisdeildini.

Í fyrstu atløgu er talan um eina verkætlan og starvssetan í eitt ár.