Niðurdottið ferðafólkaflogfar funnið

Hildið verður, at øll 110 ferðafólkini, har nærum helmingurin vórðu franskir ríkisborgarar, hava latið lív. Bjargingarlið hava váttað, at talan er um vrakið av uppkolaða flogfarinum, sum lá spjatt á jørðini.

- Tíverri funnu vit ongar persónar á staðnum. Tey sóu ongan á lívi, sigur sigur Gielbert Diendre, stjóri fyri vanlukkutilbúgvingini í Burkina Faso.

Flogfarið fór hósnáttina úr høvuðsstaðnum í Burkina Faso, Oua-gadougou, við kós móti Algeria. Tá flogfarið hevði verið á flogi í 50 minuttir misti loftferðslumyndugleikarnir sambandi við tað.

Ógreitt hví flogfarið datt niður

Enn er ikki greitt, hví flogfarið datt niður, men sambært flutningsmálaráðharranum í Burkina Faso, vildu flogskipararnir sleppa at broyta kós, tí sandstormur var í økinum har norðuri í Mali.

Forsetin í Mali, Ibrahim Keita, fer í dag til staðið, har vrakið liggur. Vanlukkan er hin ringasta í loftferðslusøguni hjá Burkina Faso, og forsetin, Blaise Dompa-oré, hevur í dag lýst landasorg í tveir dagar.

Flogfarið, ið er dottið niður, var av slagnum McDonnell Douglas MD-83, og var leigað frá spanska flogfelagnum SwiftAir.