Anita komin aftur í føroyskan sjógv

Garnaskipið Anita er komið aftur í føroyskan sjógv at royna.

Anita kom beint fyri midnátt mikukvøldið. Hon roynir vestan fyri Mykines, tætt við markið millum Føroyar og Ísland. Skipið hevur loyvi at fiska havtasku og svartkalva við gørnum. 

Anita fór 28.juni av Runavík til spanska býin Santa Uxia Ribeira, hagar skipið kom 4.juli, at rigga til at fara aftur til fiskiskap. 

Og haðani fór Anita so fríggjadagin í síðstu viku við kós móti Føroyum.  

Løgmaður ræður

Fyrr í summar upplýsti Jacob Vestergaard, at løgmaður ger av, um Anita sleppur aftur til fiskiskap við føroyskum veiðiloyvi. Vørn hevur nevnt møguleikan at taka aftur veiðiloyvi og tá samstundis øll fiskirættindini hjá Anitu. 

Heimildina at gera tað hevur landsstýrismaðurin í fiskivinnumálum.

Men av tí at umsitingin hjá landsstýrismanninum er ógegnig at viðgera málið, hevur løgmaður avgjørt sjálvur at viðgera og avgera, um veiðiloyvið hjá Anitu skal takast aftur.  Á Løgmansskrivstovuni verður upplýst í dag, at har er eingin avgerð tikin, men arbeitt verður við málinum.