Varðhaldsfongslingin longd uttan rættarfund

Maðurin, sum er skuldsettur fyri at hava beint fyri einum manni í Hvalba tann 9.august, skal vera fýra vikur afturat í varðhaldinum í Mjørkadali.

Varðhaldsfongslingin verður longd fýra vikur, til 3.oktober, uttan rættarfund. 

Í grundlógaravhoyring 10.august varð 23 ára gamli maðurin varðhaldsfongslaður til 5.september.   

Manndráp

Maðurin er skuldsettur fyri manndráp. Hann er skuldsettur fyri at hava stungið ein 36 ára gamlan mann tríggjar ferðir í hálsin.

Í grundlógaravhoyringini tók skuldsetti maðurin ikki støðu til skuldarspurningin. Og tað hevur hann framvegis ikki gjørt, sigur verjin hansara, Christian Andreassen.

Skuldsetti maðurin hvørki játtar ella noktar seg sekan.

Tøkniligu kanningarnar í málinum eru ikki lidnar, og tað er mentalkanningin heldur ikki.