Nú skal Vørn spyrjast um loyvi at taka hummara

Fiskimálaráðið hevur flutt fiskiloyvini til hummara á føroyskum sundum og firðum til Vørn at umsita og avgreiða.

Frammanundan umsitur Vørn onnur fiskiloyvi, sum Fiskimálaráðið hevði fyrr.  

Sambært kunngerð, sum kom í gildi 1.september, er loyvt at royna eftir hummara á átta økjum.

Felags árskvotur eru fyri hvørt økið. Kvoturnar eru tilsamans knappliga 81 tons í hesum fiskiárinum.

Bara tey, sum høvdu hummaraloyvi í farna fiskiári, sleppa at royna eftir hummara í nýbyrjaða fiskiárinum.

Bátar, sum eru størri enn 15 tons, sleppa ikki at seta hummararúsur.