Kvinnurørslan tapti fyri Svøríkidemokratunum

<p>Við 3,1 prosenti av atkvøðunum megnaði Kvinnurørslan ikki at koma upp um sperrumarkið, sum er 4,0 prosent. Men Hanne Sanders, professari í søgu við lærda háskúlan í Lund, heldur tó, at boðskapurin hjá teimum kom til sjóndar.&nbsp;</p>

<p>- Sum einasti flokkur, ið&nbsp;viðger&nbsp;og samantvinnar rasuhatur og stríðið at vinna konufólki somurættindi sum mannfólk, hava tær verið við í valstríðnum, sigur Hanne Sanders við Ritzau-tíðindastovuna.</p>

<p><strong>Ónøgdar við kósina</strong></p>

<p>Og boðskapurin hevur fingið stuðul frá millum annað ungum kvinnum, sum eru ónøgdar við kósina, sum samfelagið hevur sett út í kortið.</p>

<p>- Aðal stríðmálið hjá teimum er at stríðast móti hvíta manninum. Tær siga, at tað er hann, sum hevur vald yvir kvinnuni, og hann hevur skapt so nógv vánaligt í samfelagnum, sigur Hanne Sanders, og leggur aftrat:&nbsp;</p>

<p>- Flokkurin er úrslit av svensku kvinnurørsluni, sum fyrr stríddist móti politisku skipanini. Tær hava tosað við kvinnur, sum siga, at vit siga nógv, men hvat verður framt í verki.</p>

<p><strong>Stríðið heldur fram</strong></p>

<p>Leiðarin fyri flokkinum, Feministerna, Gudrun Schyman, harmast ósigurin, men stríðið heldur fram, sigur hon.</p>

<p>Leiðarin fyri sosialdemokratunum, Stefan Löfven, verður helst nýggjur forsætisráðharri í Svøríki. Fyri framman stendur trupla uppgávan, næstu dagarnar at fáa stuðul og at skipa nýggja stjórn.</p>