Sea Shepherd aftur í Føroya rætti: nokta seg sek

Í dag hava átta Sea Shepherd fólk fingið boð um at møta í Føroya rætti.

Tey eru ákærd fyri at hava brotið politiviðtøkuna og grindakunngerðina tann 30.august, tá grindadrápið var á Sandi.

Øll átta nokta seg sek.

Fólkini vóru í trimum bátum hjá Sea Shepherd. Sambært ákæruni fóru tey inn um markið, sum sýslumaðurin ásetti.

Ein fjórðingur

Markið var ein fjórðingur úr landi. Men bátarnir hjá Sea Shepherd virdu ikki markið, sigur ákæruvaldið.

Sjey av teimum átta ákærdu fólkunum eru enn í Føroyum.

Politiið tók bátarnar og hevur teir enn.

Seks onnur Sea Shepherd fólk fingu herfyri 1.000 kr. í bót fyri at bróta politiviðtøkuna og grindakunngerðina, tá grindadrápið var á Sandi. Tey fólkini vóru á sandinum og úti í sjónum. Eisini tey noktaðu seg sek.