Framvegis ófriðaligt í Hong Kong

Nýggir samanbrestir hava verið millum mótmælisfólk og løgregluna í Hong Kong í nátt.

Fólk í túsaundatali vóru úti á gøtunum og mótmæltu, at Kina ætlar sær avgerandi orðið um, hvør skal sleppa at stilla upp til landspartavalið í Hong Kong í 2017. Kravið er, at Kina ikki leggur seg út í valið og at demokratisk viðurskifti skulu valda.

Leiðarin í Hong Kong, Cy Leung, hevur boðað frá, at politiið fer at síggja til, at skúlar og almennar skrivstovur lata upp í morgin.

Áðrenn ófriðurin brast á, hevði stýrið í Hong Kong sagt seg vera til reiðar at tosa við umboð fyri mótmæliðfólkið, men tað varð avlýst, tá samanbrestir tóku seg upp.

Studentarnir hava ákært stjórnina fyri at lata ófriðakroppar leypa á mótmælisfólkið fyri at skapa rok, men tað hevur løgregluovastin avsannað.