Russiskir hermenn fáa skuldarlætta

Russiski forsetin, Vladimir Putin, hevur skrivað undir eina kunngerð, um at nýggjir hermenn og familjur teirra skulu fáa skuldarlætta.

Tað boðar russiska stjórnin í Kreml frá, sambært tíðindastovuni Reuters.

Í einføldum frágreiðingum verða fólk, sum hava skrivað undir sáttmála við russiska verjumálaráðið frá 1. mai, leys av møguligari skuld heilt upp í 10 milliónir rublar, sum svara til nærum 900.000 krónur í okkara peningi. 

Binda seg í eitt ár

Sama er galdandi fyri hjúnafelagan hjá teimum.

Men hetta krevur, at nýggju hermenninir skriva undir sáttmála fyri í minsta lagi eitt ár í russiska herinum, stendur í fráboðanini.

Tiltakið er liður í royndini hjá Moskva at styrkja herin, og at fáa fleiri fólk til drúgva kríggið í Ukraina.