Veiðiloyvið hjá Anitu kann ikki takast uttan dóm

Einki lógarbrot er staðfest í rættinum.

Tí kann løgmaður ikki taka veiðiloyvið hjá Anitu.

Tað skrivar advokaturin hjá partafelagnum Seta, sum eigur garnaskipið Anitu, í hoyringarsvari til Løgmansskrivstovuna.

Vørn hevur biðið um, at Anita missir veiðiloyvið fyri brot á lógina um vinnuligan fiskiskap. Og løgmaður hevur sent reiðaríinum ætlanarskriv um, at hann fer at taka loyvið frá skipinum.

Eingin dómur eingin heimild  

Men Jens Andrias Vinther, advokatur hjá Seta, sigur í dag í hoyringarsvarinum til Løgmansskrivstovuna, at ikki ber til at siga, at lógin er brotin, fyrr enn brotið er staðfest. 

Og rætturin hevur einki brot staðfest, sigur advokaturin.

Tí kann løgmaður ikki brúka heimildina í lógini um vinnuligan fiskiskap til at taka veiðiloyvið.     

Reiðaríið og skiparin á Anitu eru ákærd fyri at bróta kunngerðina um fiskiskap eftir havtasku og svartkalva við gørnum á føroysku landleiðini.

Men Føroya rættur hevur ikki viðgjørt málið og tí sjálvandi heldur ikki felt dóm enn.

Jens Andrias Vinther ger vart við í svarinum til Løgmansskrivstovuna, at í september vóru fólk frá Brimli á Anitu í fýra dagar, og kanningin hjá Brimli vísti, at alt var í lagi.