Annar japanski gíslin skal vera tikin av døgum

Japanska stjórnin kannar nú, um ein islamski staturin hevur avrættað ein japanskan gísla.

Islamski staturin hevur tveir japanskar gíslar, og hevur roynt at fingið 1,3 milliardir krónur fyri at lata teir leysar, men japanski forsætisráðharrin, Shinzo Abe, hevur hvassorðaður sagt, at japanska stjórnin fer ikki at boyggja seg fyri kravinum.

Nú verður so roynt at fáa staðfest, um tað er rætt, at annar av japansku gíslunum,  Haruna Yukawa, er hálshøgdur.

Krevja at Jordan letur kvinnu leysa

Sjálvt drápið verður ikki víst, men á eini videoupptøku heldur hin gíslin, Kenji Goto Jogo, á eini fotomynd av hálshøgda landsmanninum og sigur, at eisini hann fer at doyggja, um kravið hjá islamska statinum ikki verður eftirlíkað.

Og kravið er nú, at Jordan skal lata eina irakiska kvinnu, Sajida al-Rishawi, leysa. Hon varð handtikin, tá al Qaeda í 2005 framdi bumbuálop á eitt hotel í Amman og 38 fólk doyðu.

Sajida al-Rishawi er dømd til deyða í Jordan, men avrættingin er útsett, tí hon hevur kært dómin.