Løgreglan váttar: Vit hava helst dripið hann

Løgreglan í Keypmannahavn hevur skotið ein mann, sum hon heldur framdi atsóknina á Østerbro seinnapartin í gjár og í nátt skeyt ein vaktarmann í jødisku synagoguni í Keypmannahavn.

- Vit halda, tað er sami maður, ið stóð fyri báðum atsóknunum, segði Torben Mølgaard Jensen, leiðandi politiinspektørur á tíðindafundinum á politigarðinum í Keypmannahavn.

Greinin heldur fram niðanfyri

Politiet har skudt og dræbt en mand http://t.co/XRTHkWDxRG

— Københavns Politi (@KobenhavnPoliti) February 15, 2015

Løgreglan fekk illgruna til mannin seinnapartin í gjár, og valdi tískil at halda eitt vakið eyga við manninum. Tá maðurin kom aftur í íbúðina í nátt, varð hann dripin eftir skotbardaga millum løgregluna og mannin.

Vakmyndatól feldu mannin

Ein hýruvognsførari og myndir, sum vakmyndatól tóku, vóru við til at fella mannin, sum drap tvey fólk á Østerbro og á jødisku synagoguni í Keypmannahavn seinnapartin í gjár og í nátt.

Fyribils arbeiðir løgreglan við ástøðinum, at maðurin, ið varð dripin í nátt, var einsamallur um yvirgangsatsóknina í Krudttønden seinnapartin í gjár, tá ein maður varð dripin og trý løgreglufólk vórðu særd.

Hóast løgreglan heldur, maðurin var einsamallur um yvirgangsálopið seinnapartin leygardagin, skal hvør steinur í málinum vendast. Arbeiðið at uppklára málið kann tískil verða drúgt.

Forsætisráðharrin fordømir álopið

- Danska tjóðin hevur verið gjøgnum nakrar tímar, vit ongantíð fara at gloyma, segði Helle Thorning-Schmidt á tíðindafundi í morgun, áðrenn hon legði blómur við synagoguna.

- Vit fáa ikki vart okkum 100 prosent, um ein ørvitisknokkur vil lata sítt egna lív í eini yvirgangsatsókn, segði Helle Thorning-Schmidt á tíðindafundinum í morgun.

Greinin heldur fram niðanfyri

VIDEO: Danish Prime Minister Helle Thorning-Schmidt lays flowers at site of fatal shooting near synagogue: http://t.co/Ynw9hjalZ9

— The Associated Press (@AP) February 15, 2015

- Fólk í Keypmannahavn fara at síggja ein øðrvísi danskan høvuðsstað við fleiri løgreglufólkum á gøtuni enn vanligt, segði løgmálaráðharrin, Mette Frederiksen, á tíðindafundinum.

Størsta politiuppgávan í nýggjari tíð

Síðan klokkan hálvgum fýra seinnapartin leygardagin hevur løgreglan í Keypmannahavn stjórnað einum av teimum størstu átøkunum hjá donsku løgregluni í nýggjari tíð.

- Vit hava fingið hjálp frá Ríkisløgregluni, trygdarløgregluni PET og frá teimum ymisku politiøkjunum kring landið, segði Torben Mølgaard Jensen.

Uppgávan hjá donsku løgregluni verður nú eisini at virka fyri, at fólk í Danmark, og serliga Keypmannahavn, aftur kunnu kenna seg trygg, varð upplýst á tíðindafundinum.

Vakt ans um allan heim

Skottilburðirnir í Keypmannahavn í gjár og nátt hava vakt ans um allan heim, og donsku myndugleikarnir hava fingið nógvar samkensluheilsanir.

Eisini Kaj Leo Holm Johannesen, løgmaður, hevur sent stjórnini samkensluheilsan. Hann sigur, atsóknin er álop á tali- og skrivifrælsið og tey grundleggjandi virði, okkara samfelag byggir á.

Helle Thorning-Schmidt, forsætisráðharri, segði fyrr í morgun, talan var um blóðug yvirgangsálop, sum eingin fór at sleppa væl frá.