Kommunur fáa rokning fyri viðgjørdar sjúklingar

Frá í summar fara kommunurnar at fáa rokning fyri fólk, sum eru á sjúkrahúsi, hóast tey eru liðugt viðgjørd har.

Tað ætlar Karsten Hansen, landsstýrismaður í heilsumálum, sum hevur lagt uppskot fyri løgtingið um at broyta lógina um sjúkrahúsverkið. 

Ikki øll, sum eru liðugt viðgjørd á sjúkrahúsi, kunnu fara haðani, tí hvørki heimarøkt ella røktarheimspláss eru tøk í kommununi, tey eru skrásett í.

Gjaldið kann í mesta lagi vera 2.000 kr. um samdøgrið. Í fjør var dagsprísurin 1.347 kr.

Lógarbroytingin skal koma í gildi 1.juni.

Kommunurnar hava ábyrgdina

Av tía at kommunurnar frá 1.januar í ár hava ábyrgdina av heimatænastu og eldrarøkt, heldur Karsten Hansen, at kommunurnar eisini eiga at bera útreiðslurnar, sum sjúkrahúsini fáa, tá tey ikki kunnu útskriva sjúklingar, sum eru liðugt viðgjørdir, til kommunalu heimatænastuna og eldrarøktina. 

Hetta verður gjørt í grannalondunum, sigur landsstýrismaðurin. 

Kommunufelagið tekur undir við uppskotinum, men við teirri treyt, at kommunurnar fáa pengarnar frá landinum saman við pengunum, sum kommunurnar fáa til eldraøkið og heimarøktina. 

Men Kommunufelagið vil fyrst hava greiði á ábyrgdarbýtinum millum kommunurnar, Almannamálaráðið og Heilsumálaráðið á hesum øki.

Sambært tølum, sum Heilsumálaráðið hevur frá sjúkrahúsunum, vóru 38 liðugt viðgjørd fólk á teimum trimum sjúkrahúsunum í fjør, tey høvdu 2.366 innleggingardagar.