Nýggj kanning varpar ljós á kynsligu misnýtsluna

Ein nýggj kanning, ið grønlendska familju- og vælferðarstýrið hevur bílagt, vísir, at stórur partur av grønlendskum ungdómi hava verið fyri kynsligum ágangi.

Stórur partur av børnum í Grønlandi, sum hava verið fyri kynsligum ágangi, fáa trupulleikar seinni í lívinum, kemur fram í nýggju kanningini.

Kanningin, ið grønlendska familju- og vælferðarstýrið hevur bílagt vísir, eisini, at greiður samanhangur er millum kynsliga ágangin og stórar trupulleikar millum ung.

Tak niður kanningina her: Unge i Grønland (PDF-skjal, letur upp í nýggjum kaga)

Endamálið við kanningini er at økja um vitanina um kynsliga ágangin, títtleikan av kynsligum ágangi móti børnum, og hvat kynsligi ágangurin merkir fyri hesi børn.

Misbrúktu børnini drekka illa

Vitanin skal brúkast í arbeiðnum at fyribyrgja kynsligum ágangi móti børnum. Úrval av ungum millum 18 og 25 ár hava svarað spurnarbløðum, telefonsamrøður eru gjørdar við fleiri og upplýsingar eru fingnar til vega frá grønlendsku hagstovuni.

Kanningarnar vísa millum annað, at ung, sum í barnaárum hava verið fyri kynsligum ágangi, millum annað byrja tíðliga og nýta stórar nøgdir av rúsdrekka, tey roykja nógv hash og hava lágt sjálvsvirði.

Harumframt vísa kanningarnar hjá granskarunum eisini, at ungar gentur, sum vóru kynsliga misbrúktar sum børn, sjáldan fara undir útbúgving eftir fólkaskúlan, - og at tær gjørdust við barn á ungum árum.

Brúka kanningarúrslitið fyribyrgjandi

Vónin hjá granskarunum, sum hava gjørt kanningarnar, eru, at úrslitini kunnu hjálpa til í fyribyrgjandi arbeiðnum móti kynsligari misnýtslu av børnum.

- Týdningamikil partur av trupulleikunum, sum Grønland hevur við unga ættarliðnum, hongur saman við, at nógv ung hava verið fyri kynsligum ágangi. Tí er tað gongd leið at styrkja fokusið, sum grønlendska landstingið hevur á fyribyrging, sigur Else Christiansen, seniorgranskari.

Else Christiansen, seniorgranskari, hevur, saman við Siddhartha Baviskar, seniorgranskara, gjørt kanningarnar.