Tunlar millum oyggjar sera góð íløga hjá landinum

Tað gongur so væl hjá teimum báðum undirsjóvartunlunum, at teir eru ein sera góð íløga hjá landinum.

Tað skrivar Eyðfinn Reyðberg í Vinnuvitan.

Hann skrivar, at P/f Norðoyatunnilin verður liðugur at gjalda alla skuld í 2017.

Í fjør hevði Norðoyatunnilin eina góða millión krónur í avlopi fyri skatt.

Avskrivingarnar upp á tunnilin vóru 11,5 mió. kr. í 2014.

Skuldin var niðurgoldin við 11 milliónum í 2014, og skuldin er nú komin niður á góðar 37 mió. kr.

Vágatunnilin skuldarfríur

Hin undirsjóvartunnilin, P/f Vágatunnilin, hevði slakar fimm mió. kr. í avlopi í 2014.
Hetta er eftir avskrivingar upp á átta mió. kr., so úrslitið fyri rentur og avskrivingar var slakar 13 mió. kr. í fjør.
Vágatunnilin er liðugur at gjalda øll lán, og er felagið í dag skuldarfrítt.
Harumframt eigur Vágatunnilin níggju milljónir krónur á bók í tøkum gjaldføri.
Eginognin í felagnum er í dag 176 mió. kr. Upprunaligi partapeningurin hjá landinum var 160 mió. kr.

Sera góð íløga

Talan hevur sostatt verið um eina sera góða íløgu hjá landinum.

Verður hildið fram eftir sama leisti sum higartil, kann landið fáa í minsta lagi 10 mió. kr. í vinningsbýti á hvørjum ári. Við tí kann landið fáa allan sín partapening í Vágatunlinum útgoldnan aftur hesi komandi 15 árini, skrivar Vinnuvitan.