Avmarka kjarnorkuvirksemið í Iran

Drúgvar samráðingar hava verið millum Iran øðrumegin og USA, Russland, Frakland, Bretland, Kina og Týskland hinumegin.

Afturfyri at Iran avmarkar menningar-arbeiðið innan kjarnorku sleppir landið undan teimum altjóða handilstiltøkum, sum hava rakt Iranska búskapin meint í fleiri ár.

Iran hevur alla tíðina sagt, at kjarnorku-menningin er til friðalig endamál, men landið hevur samstundis noktað altjóða kjarnorkueftirlitinum at kanna støð í Iran, sum neyðug eru at kanna fyri at fáa staðfest, hvat endamálið við virkseminum er.

Samráðingarnar eru eftr øllum at døma endaðar við eini neyðsemju millum partarnar um, í hvønn mun altjóða samfelagið skal hava atgongd til at hava eftilit við kjarnorkuvirkseminum í Iran.