Ferðafólk til Lesbos kunnu hava 20 kilo eyka við

Nógv flóttafólk koma til griksku frítíðaroynna, Lesbos. Fyri at hjálpa teimum, hava fleiri ferðaskrivstovur avgjørt, at ferðafólk hjá teimum kunnu taka 20 kilo eyka við í flogfarið, um tað eru klæðir og annað at geva flóttafólkunum.

Fleiri túsund flóttafólk eru komin við báti til oynna Lesbos í ár.

Tey flýggja undan víðgongda islamska yvirgangsfelgasskapinum ISIL, undan Assad og borgarakrígnum í Sýria.

Oyggin Lebos og teir 85.000 íbúgvarnir í oynni, megna ikki at veita teimum fleiri túsund flóttafólkunum, sum nú eisini eru á oynni, tak yvir høvdið. 

Legan, har flóttafólkini skulu skráseta seg, hevur pláss fyri 500 fólkum, men hýsir 3.000 fólkum. Hvønn dag koma bátar við flóttafólkum til oynna.

Pláss er ikki fyri øllum, og flóttafólkini eru tí úti á gøtuni. 

Saman við flóttafólkunum ganga eisini ferðafólk, sum eru farin til oynna at hugna sær í sólini.

- Øll hesi ferðafólkini, hava altso nú møguleika at taka 20 kilo eyka av klæðum og øðrum við at geva flóttafólkunum, sigur umboð fyri ferðaskrivstovurnar.