Fólk í túsundatali flýggja undan skógareldum

9.000 sløkkiliðsfólk stríðast í løtuni við at basa 21 ymiskum skógareldum í Kalifornia, har turkur hevur verið í fýra ár

Turkur í fýra ár hevur kynt í 21 ymiskar skógareldar í Kalifornia, har fólk í túsundatali eru flýdd frá húsum

Mynd: AP

Bjarni Mohr

03.08.2015 - 13:53

Higartil hevur eitt sløkkiliðsfólk latið lív í ógvusligu skógareldunum, sum í løtuni gera um seg har norðuri í Kalifornia, skrivar tíðindastovan, Ritzau.

- Tilsamans eru 12.000 fólk í 5.156 húsum og íbúðum rýmd frá húsum, siga sløkkiliðsmyndugleikarnir í eini fráboðan, ið varð send út mánamorgunin.

Kort: Her herja skógareldarnir

Skógareldarnir koma í kjalarvørrinum á herviliga turkinum í Kalifornia, sum higartil hevur vart í fýra ár, sambært amerikonsku tíðindastovuni, CNN.

50 hús eru longu oyðiløgd í skógareldunum, meðan 6.000 aðrir bygningar eisini eru í vanda fyri at fara upp í royk meta myndugleikarnir.

Greinin heldur fram niðanfyri

Í Lower Lake, í landnyrðing úr Sacramento, stríðast 2.000 sløkkiliðsfólk í løtuni við at basa tí ógvusligasta skógareldinum av teimum 21.

Tað er ikki bert á landi, at ein roynd verður gjørd at basa ógvusligu skógareldunum. 19 tyrlur eru eisini settar inn at hjálpa til í sløkkiliðsarbeiðinum.