Skjóta táragass eftir flóttafólkum

Ruðuleiki valdar har suðuri í Makedónia, har túsundtals flóttafólk royna at sleppa sær inn í landið í royndini at flýggja úr Grikkalandi

Ruðuleiki valdar har suðuri í Makedónia, við markið til Grikkalands, eftir at túsundtals flóttafólk royna at koma sær um markið

Mynd: AP

Bjarni Mohr

21.08.2015 - 10:50

Makedónia varð í gjár noytt at lýsa undantaksstøðu við markið har suðuri í landinum, eftir at túsundtals flóttafólk í Grikkalandi royndu at flýggja um markið.

Myndugleikarnir í Makedónia meta, at 44.000 flóttafólk, ið eru komin í bátum um Miðjarðarhavið seinasta mánaðin, eru flýdd um markið har suðuri í Makedónia, har ruðuleiki valdar.

- Vit vilja til Týskland, so vit kunnu byrja eitt nýtt lív. Fullkomin ruðuleiki valdar í Sýria, har alt er oyðilagt, sigur ein kvinna, ið er flýdd úr Sýria við familjuni, sambært AP.

Greinin heldur fram niðanfyri

Desperate migrants struggle on their way to their dream location: Western Europe http://t.co/DEN3lbJbXi
— The Associated Press (@AP) August 21, 2015

Fleiri flóttafólk, ið royna at flýggja úr Grikkalandi, hava fingið skaða í samanbrestunum við makedonsku løgregluna, skrivar tíðindastovan, AP.

Síðani januar eru 160.000 flóttafólk komin til Grikkalands, sambært ST. Bert tann seinasta mánaðin eru 50.000 flóttafólk komin til Grikkalands metir ST.