Fingu onga vegleiðing fyri deyðavanlukku

Menninir, sum lossaðu frystan makrel í lastini á grønlendska trolaranum Ilivileq um náttina 25. september í fjør, fingu hvørki vegleiðing um trygd ella upplæring um arbeiðið, áðrenn teir fóru til arbeiðis.

Tað hava teir greitt løgregluni frá eftir arbeiðsvanlukkuna umborð. Heldur ikki umborð var nøkur vegleiðing givin um arbeiðið ella, hvussu útgerðin, teir brúktu, skuldi brúkast. Tað stendur í frágreiðingini hjá Arbeiðseftirlitnum til fútan.

Óroynd arbeiðsfólk

Kringvarpið hevur fingið innlit í frágreiðingina. Arbeiðseftirlitið staðfestir, at menninir vóru mest sum óroyndir ella lítið royndir lossingarmenn.

Hjá 22 ára gamla Gunnari Zachariasen, sum doyði, tá ein plattur við 1292 kiloum av frystum makreli brotnaði á veg upp úr lastini, var hetta fyrsta vaktin sum lossingarmaður hjá Faroe Maritime Services.

Menninir, sum lossaðu Ilivileq, arbeiddu hjá Faroe Maritime Services. Sambært avhoyringum hjá løgregluni visti arbeiðsgevarin, at hann hevði skyldu til at læra fólkið at lossa.

Mannagongdirnar vóru ógreiðar

Felagið hevði bæði tilfar og mannagongdir til upplæringina, skrivar Arbeiðseftirlitið. Avhoyringarnar vísa kortini, at mannagongdirnar vóru ógreiðar fyri yvirskipaðu fólkini í fyritøkuni, teimum, sum tóku móti arbeiðsmonnunum á Eystaru bryggju í Havn og arbeiðsformonnunum í lastini.

Báðir partar tykjast hava hildið, at hin parturin skuldi kunna og læra fólkið, skrivar Arbeiðseftirlitið. Avhoyringarnar hjá løgregluni vísa eisini, at formaðurin í lastini, har sum vanlukkan hendi, ikki tryggjaði sær, at nýggju arbeiðsmenninir dugdu at brúka útgerðina, ella skiltu vandan í slíkum arbeiði.

Stjórin i Faroe Maritime Services var ikki sjálvur á staðnum. Arbeiðseftirlitið mælir til, at Faroe Maritime Services fær 40.000 kr. í bót fyri ikki at halda sínar skyldur.

Onga viðmerking enn

Pauli Joensen, nevndarformaður í Faroe Maritime Services, sigur, at felagið fekk frágreiðingina hjá Arbeiðseftirlitinum í gjáramorgunin.

Felagið vil hava stundir at lesa frágreiðingina gjølla, áðrenn tað ger nakra viðmerking um hana, sigur Pauli Joensen.