Rørsla fyri fólkaræði fær friðarheiðursløn Nobels

Friðarheiðurslønin hjá Nobel 2015 verður latin The National Dialog Quartet í Tunesia, varð kunngjørt fyri løtu síðani í Oslo, har heiðurslønin varð kunngjørd.

Rørslan, The National Dialog Quartet, hevur arbeitt fyri fólkaræði í Tunesia seinastu tvey árini eftir at gongdin at menna fólkaræðið var í vanda at fara fyri bakka.

Forkvinnan í nevndini, ið letur friðarheiðurslønina, segði millum annað, at The National Dialog Quartet fær heiðurslønina fyri sítt íkast at tryggja pluralistiskt fólkaræði eftir uppreisturin í 2011.

273 vóru í uppskoti

Tilsamans vóru 273 í uppskoti at fáa friðarheiðursløn Nobels 2015, áðrenn tað varð avdúkað í morgun - 68 felagsskapir og 205 fólk.

Gitingarnar hava, sum altíð, verið um, hvør fekk heiðurin. Tey flestu hildu, at týski samveldiskanslarin, Angela Merkel, var eitt gott boð. Eisini varð gitt, at Frans pávi fór at fáa friðarheiðurslønina.

Umframt heiðurin fylgir eisini peningur við friðarheiðurslønini, átta milliónir krónur. Friðarheiðurslønin verður latin á samkomu 10. desember.