Meginparturin av føroyingum koyra ov skjótt

68 prosent av øllum føroyingum halda seg ikki til ferðahámarkið, og koyra skjótari enn ásetingarnar í ferðslulógini, vísir kanning hjá Ferðsluitrygd

Meginparturin av øllum føroyingum halda seg ikki til ásettu hámarksferðina, men velja heldur at hoyra ov skjótt. Menn eru ótolnari og yvirhála oftari enn enn kvinnur, vísir kanning hjá Ferðslutrygd

Bjarni Mohr

15.10.2015 - 15:52

Ert tú ein av teimum, ið koyrir skjótari enn loyvt er, so ert tú ikki einsamallur. Tað vísir ein hugburðskanning, Ferðslutrygd gjørdi í apríl mánað.

Bert 32 prosent av teimum spurdu svaraðu, at tey halda seg til ásettu hámarksferðina, tá tey koyra bil. Restin, tað vil siga 68 prosent, siga seg koyra ov skjótt.

53 prosent av teimum spurdu siga seg koyra 90 km/t. 13 prosent siga seg koyra 100 km/t, og 1 prosent siga seg koyra 110 km/t ella skjótari.

Menn stóru syndararnir

Fóturin hjá monnum hongur tyngri á spitaranum enn hjá kvinnum. Tað er í øllum førum ein av niðurstøðunum í hugburðskanningini, ið varð gjørd í vár.

Í øllum aldursbólkum svara fleiri menn enn kvinnur, at teir koyra skjótari enn teir loyvdu 80 kilometrarnar um tíman, ið er hámarksferðin á landsvegnum.

Besti hátturin at fáa bilførarar at halda hámarksferðina er at fáa løgregluna at herða eftirlitið við ferðsluni, svaraðu tey spurdu í hugburðskanningini hjá Ferðslutrygd.