Óvist um Bústaðir taka við rakstrinum av Skúlaheiminum

- Skulu vit taka okkum av Skúlaheiminum, skal bygningurin setast í stand, og vit mugu fáa at vita, hvat tað fer at kosta, áðrenn vit taka avgerð. 

Tað sigur Jógvan Ósá, stjóri í Bústøðum, í sambandi við, at Bústaðir hava fingið fyrispurning um at yvirtaka raksturin av Skúlaheiminum í Havn.

Í vár fingu Bústaðir fyrispurning frá leiðsluni á Glasi, um Bústaðir eru sinnaðir at yvirtaka raksturin av Skúlaheiminum.

Glasir rekur Skúlaheimið, men vil sleppa av við raksturin.

Ætlaðu at hækka leiguna

Av tí at fíggjarstøðan var sperd, boðaði leiðslan á Glasi frá í vár, at leigan skuldi hækka í august í ár, og so aftur í januar næsta ár, men hesum ætlanum steðgaði Bárður á Lakjuni, landsstýrismaður í mentamálum. 

Hann sigur í stuttari viðmerking, at  at ein arbeiðsbólkur er settur, sum skal koma við tilmæli í september, hvat skal henda og møguliga gerast við bygningin, sum hýsir Skúlaheiminum í Havn.

Hoyr innslag í útvarpstíðindunum: