Dátugrunnur skal fyribyrgja flogvanlukkum

Ein arbeiðsbólkur undir EASA kom í summar við tilmælum um, at nýggir flogskiparar verða sálarliga kannaðir, og at ein dátugrunnur verður skipaður við upplýsingum um, hvønn heilivág flogskipararnir taka.

Í mars læsti ungi stýrimaðurin, Andreas Lubitz, seg inni í stýrihúsinum á einum flogfari hjá týska flogfelagnum Germanwings og rendi tað við vilja niður í Alpurnar.

SÍ EISINI Upptøkur í svarta kassanum vátta illgruna

Øll 150 fólkini, sum vóru í flogfarinum, doyðu. Seinni er komið undan kavi, at Andreas Lubitz var sjúkur av tunglyndi, og at hann hevði dult sjúkuna fyri arbeiðsgevaranum.

EASA sigur, at dátugrunnurin skal gera tað lættari at fáa hendur á medisinskum upplýsingum, men tó skal privatlívið hjá flogskiparum virðast.

SÍ EISINI Lubitz var undir læknaeftirliti

Men tað verður ikki sum at siga tað at skipa ein slíkan dátugrunn, tí persónsupplýsingarlógirnar í londunum, sum eru limir í EASA, eru so ymiskar.

Arbeiðsbólkurin mælir til, at ein javnvág verður funnin, tá ræður um tagnarskylduna hjá læknum og almennu trygdina.

Men evropeiski loftferðslustovnurin heldur, at ES-nevndin eigur at avgera spurningin um at verja persónligar upplýsingar.