Putin: IS bumbaði flogfarið

Tað var ein yvirgangsatsókn, ið var atvoldin til, at russiska ferðafólkaflogfarið datt niður á Sinai-hálvoynni leygardagin fyri tveimum vikum síðani

Yvirgangsrørslan, Islamiskur statur, bumbaði flogfarið, ið datt niður í Egyptalandi fyri tveimum vikum síðani, steðfestir russiski forsetin sambært tíðindastovuni Reuters

Mynd: Savnsmynd/AP

Brynhild Thomsen

Bjarni Mohr

17.11.2015 - 12:14

Hetta staðfestir Vladimir Putin, forseti í dag sambært tíðindastovuni Reuters. Vladimir Putin, russiski forsetin, sigur, at nú skulu tey seku finnast.

Russiska fregnartænastan, FSB, upplýsir, at tey hava funnið slóðir av spreingievni í vrakinum, og stjórin í FSB, Alexander Bortnikov sigur, at talan var um eina heimagjørda bumbu.

Russland fer í hesum sambandi at herða loftálopini í Sýria, har yvirgangsrørslan IS heldur til. Reuters skrivar, at egyptiskir myndugleikar hava tvey starvsfólk í floghavnini Sharm el-Sheikh í varðhaldi.

SÍ EISINI Lítil ivi longur, bumba var í russiska flogfarinum

Fólkini eru í varðhaldi, tí illgruni er um, at tey hava hjálpt til at fáa spreingievni umborð á flogfarið. Talan er, sum skilst, um tvey trygdarfólk, sambært Reuters.

AFP skrivar, at Russland vil lata 350 milliónir krónur í finningarløn fyri upplýsingar um tey fólk, sum fingu bumbuna umborð.

Flogfarið var á veg tann 31. oktober úr Egyptalandi til Sankta Pætursborg í Russlandi, tá tað 22 minuttir eftir fráferð hvarv av radaranum og datt niður. 224 fólk lótu lív. Yvirgangsbólkurin Sinai Province, sum stuðlar IS, hevur tikið ábyrgdina av vanlukkuni.