Nú verður dýrari at hava bil í Føroyum

Á nýggjárinum verður dýrari at hava bil í Føroyum, tí landskassin hevur brúk fyri pengum. Vektgjaldið, ella vegskatturin, hækkar tíggju prosent

Tað verður nú dýrari at hava bil. Á nýggjárinum hækkar vegskatturin við tíggju prosentum, og ætlanin er at brennievni og smyrjiolja eisini verða dýrari

Høgni Djurhuus

Bjarni Mohr

25.11.2015 - 10:16

Vektgjaldið hevur verið óbroytt síðani 2009. Samstundis er ætlanin at lækka vektgjaldið fyri elbilar, sum higartil hava goldið sama vektgjald sum dieselbilar, og tað er hægsta vektgjaldið.

Fíggjarmálaráðið sigur, at stundir vóru ikki at senda uppskotið til ummælis. Hækkaða vektgjaldið er mett at geva landskassanum tíggju milliónir krónur afturat næsta ár.

Brennievnið verður eisini dýrari

Harafturat er ætlanin at leggja 30 oyru oman á liturin av bensini og 25 oyru á diesel. Tað skal geva landskassanum 11,2 milliónir krónur meira næsta ár.

Uppskot er um at hækka umhvørvisgjaldið á smyrjiolju 25 prosent, úr tveimum krónum upp í hálva triðju krónu fyri liturin. Tað er mett at geva landskassanum tríggjar milliónir og 750.000 kr. afturat.

Tann peningurin skal brúkast til arbeiðið hjá IRF at reinsa spillolju. Landsstýrið legði í gjár fram eina rúgvu av lógaruppskotum, sum skulu hjálpa landsstýrinum at fáa avlop í fíggjarlógina næsta ár.