Ódnarveður kravt mannalív í Noregi

Ódnarveður hevur gjørt um seg fleiri staðni í Noregi á jólum. Ringa veðrið hevur nú eisini kostað tveimum fólkum lívið

Tvey fólk í Noregi hava latið lív í ódnarveðri. Í Holmenkollen, nærhendis Oslo, doyði ein kvinna, tá ein flaggstong fór av um tvøran, og rakti kvinnuna so meint, at hon doyði

Mynd: NRK

Bjarni Mohr

25.12.2015 - 15:45

Í Holmenkollen, nærhendis Oslo, doyði ein kvinna jólaaftan, tá ein flaggstong rakti kvinnuna uttanfyri eina kirkju.

- Tað er líkt til, at flaggstongin brotnaði orsakað av nógva vindinum á staðnum, sigur Finn Belle, innsatsleiðari í økinum, sambært NRK.

Hendingin fór fram klokkan 13:30 jólaaftan. Kvinnan, í 40-árunum, fekk ógvusligar løstir, og lívið hjá henni stóð ikki til at bjarga.

Maður feyk á sjógv

Í Vest-agder, har suðuri í Noregi, doyði ein ungur maður, tá nógvur vindur blásti hann um koll og hann fór í havið. Leitingin eftir manninum er steðgað, og endað uttan úrslit, sigur løgreglan.

Ógvusligi vindurin hevur gjørt tað vandamikið at ferðast tætt við havið í økinum við Agder, har aldurnar hava verið fýra-fimm metur høgar.

Hetta er aðru ferð eftir bert fáum døgum, at ringt veður krevur mannalív í Noregi. Fyri minni enn einu viku síðani lat ein maður lív, tá ein skalvur leyp oman yvir Longyearbyen í Svalbard.