Neyðhjálp á veg til svøltandi sýrar

Trotið á mati og heilivági í sýriska býnum, Madaya, er so álvarsligt, at fólk mugu eta gras og kelidjór fyri at yvirliva

Neyðhjálpin, ið skuldi koma til fólk í Madya í Sýria, er seinkað, men er nú á veg. Á myndini eru kortini fólk í eini flóttafólkalegu í Jordan seinasta mikudag

Mynd: AP

Sigrún H. Brend

Bjarni Mohr

11.01.2016 - 10:59

Neyðhjálpin, ið skuldi koma, er seinkað, skrivar BBC. Deildir hjá Bashar al-Assad, forseta, hava kringsett uppreistrarsinnaða býin síðani juli mánaði í fjør.

Síðani oktober eru hvørki matur ella heilivágur komin til býin. Longu tá var støðan í sýriska býnum álvarslig, upplýsir BBC.

Heimsmatvørustovnurin, WFP, vónaði annars, at neyðhjálp kundi veitast teimum 40.000 íbúgvunum í býnum. Fleiri børn, sjúk og gomul eru deyð í hungri, tí tey ikki hava fingið viðgerð fyri sjúku.

Óvist hvussu nógv eru deyð

Ógreitt er, hvussu nógv fólk eru deyð. Nýggjar myndir vísa svøltandi børn, millum annað ein lítlan drong, sum ikki hevur fingið at eta í eina viku.

Óvæntaðar hendingar bera í sær,, at bilafylgið við neyðhjálp kemur í fyrsta lagi einaferð í dag til Madaya, sum liggur á einum fjallatoppi.

Madaya er ikki einasti býur, har fólk hungra, men býurin hevur verið nógv umrøddur, tí fleiri myndir frá býnum síggjast á sosialum miðlum. Til samans búgva 400.000 fólk í 15 sýriskum býum, ið eru kringsettir.