Heimsins leiðarar stúra fyri kjarnorkuyvirgangi

Fáa yvirgangsmenn hendur á eitt nú kjarnorkuvápnum, kann tað fáa álvarsamar avleiðingar fyri allan heimin. Toppfundur er í amerikanska høvuðsstaðnum

Tað kann fáa álvarsamar avleiðingar, fáa yvirgangsmenn hendur á kjarnorkuvápnum. Amerikanski forsetin er vertur fyri toppfundi, sum er í Washington. Á myndini yvirgangsatsóknin í Istanbul í januar

Bjarni Mohr

01.04.2016 - 16:11

Enn fleiri tiltøk skulu setast í verk til tess at forða fyri, at kjarnorka ikki endar á skeivum hondum.

Tað er evnið á toppfundinum um kjarnorkutrygd, sum í hesum døgum er í amerikanska høvuðsstaðnum, Washington.

Umleið 50 ríkis- og stjórnarleiðarar eru á fundinum, teirra millum danski forsætisráðharrin, Lars Løkke Rasmussen. Barack Obama, forseti, er vertur.

Toppfundur í kjalarvørrinum á atsóknum

Toppfundurin, sum verður í fýra dagar, verður hildin í kjalarvørrinum á yvirgangsatsóknunum í París í november í fjør og í Brússel í síðstu viku.

Tað hevur vakt ans, at russiski forsetin, Vladimir Putin, ikki er á fundinum í Washington. Tað er ein trupulleiki, tí flestu kjarnorkuvápnini eru í Russlandi og USA.

Barack Obama, amerikanski forsetin, hevur vissað um, at samband er við Russland um kjarnorkutrygdina.