Hópgrøv funnin í Sýria

Sýriski stjórnarherurin hevur funnið eina hópgrøv í býnum Palmyra, ið Islamski staturin misti valdið á herfyri. Tað sigur almenna sýriska tíðindastovan, Sana.

Í grøvini eru 40 lík funnin av monnum, kvinnum og børnum, summi hálshøgd og onnur skotin. Talan er um sýriskar stjórnarhermenn og familjur teirra, ið vórðu avrættað, tá islamski staturin tók býin, verður sagt.

Líkini eru flutt á eitt hernaðarsjúkrahús í landsparta-høvuðsstaðnum Homs, har tey skulu eyðmerkjast.

Ein bólkur av bretum, ið eygleiðir mannarættindi í Sýria sigur, at Islamski staturin í minsta lagi avrættaði 280 fólk, meðan hann hevði valdið í Palmyra.

Sýriski stjórnarherurin tók søguliga býin aftur fyri eini viku síðani. Aftrat avrættingunum hava islamistarnir skotið niður nógv týðandi fornminni, ið hava staðið í 2.000 ár og eru á listanum hjá UNESCO sum verd at varðveita.